去到幾多歲會鬆弛?女生陰道的20s 30s 到50s

juju

雖然你而家仲後生,但係知多啲自己下體會隨住年齡有咩基本變化,有利無害。

20s:

青春期過去,下體變化喺呢個階段唔會太大,隨住整體皮下脂肪比青春期時減少咗,外陰唇都可能會縮細少少。

30s:

內陰唇顏色可能會深色少少,通常都係由於年齡增長或懷孕時荷爾蒙改變造成,唔使擔心。生育後,骨盆底(pelvic floor)肌肉可能會比較鬆弛,建議多做提肛運動,強化嗰個部位嘅肌肉。

40s:

呢個階段身體變化會多啲,一般女性喺40中開始進入前更年期,雌激素生產開始唔穩定,有啲人每個月嘅經期會短啲,有啲人會覺得下體比較乾、痕癢,無以前咁濕潤,較容易有感染情況出現。而出現白色陰毛都係常見嘅。

50s:

進入更年期,即係停經,生育機能方面表示完成任務,女性更年期一般發生喺45至55歲之間,下體可能會覺得乾,進行性行為時感覺唔舒服,呢啲情況可以用潤滑劑去改善。由於下體組織開始收縮,可能會伴隨尿頻等情況,到時最好同家庭醫生商量下各方面嘅紓緩方案。

You may also like