點解佢成日唔聽人講?4 招令男朋友聽你講野

juju

好多女生覺得另一半唔聽佢講,好勞氣、好沮喪,喺抽秤佢行動上之不合作之前,不如準備好自己先講。

1. 表達Vs期望

講意見出嚟時,有無同時預設咗期望對方認同,甚至乎跟住去做?如果對方提出其他思考角度,有準備去思考、討論?佢乜都聽晒你話,你係咪就100%滿足?

溫馨提示:無論你哋幾夾都好,都會有唔同意見嘅時候。如果佢只係因為怕咗你日鵝夜鵝而就範,而唔係真心認同,長期落去,對段關係都唔健康。

2. 講得太仔細

女生有時會鉅細無遺咁交待一件事,等對方充分明白,但男生比較習慣聽重點,所以follow唔到。

溫馨提示:唔使太沮喪,咁唔代表佢唔關心你,男生只係習慣將心思放喺解決問題上。嘗試將你要表達嘅內容限喺2、3分鐘內交待清楚,或做一啲停頓,俾佢問問題或回應。

3. 分享時機

有時我哋太在意困擾緊自己嗰件事,而無留意到佢方係咪忙緊,忙緊包括佢覆緊message、諗緊嘢、打緊機、準備瞓覺,忽然中間插個話題入去,佢哋未必反應到。

溫馨提示:呢啲情況,好容易會引起小拗撬,最好揀你哋本身傾緊偈嘅時候,同佢講話想問佢啲嘢,等佢個腦轉得切mode。

4. 搵情緒出口

女生有時只係想另一半聽自己呻下,尤其是返工、同姊妹間嗰啲谷氣嘢,但係有時表達時激動咗、跳咗啲,於是男生俾啲情緒嚇到手足無措,或胡亂提供解決方法,於是乎仲火上加油。

溫馨提示:只要佢有聽你呻,都多謝佢,咁就夠喇。

keywords Keywords:

You may also like