他是控制狂?應對情感勒索者的生存指南

Text: juju

勒索,唔一定係講錢,有個名詞情感勒索,如遇上了又唔識處理,可能會好似借咗大耳窿咁,啲感情還極都還唔完!

3 大勒索手法:

1. 埋怨+卸責

常見用句有:「我發脾氣,係因為你激我」 、「我亂買嘢,係因為你無制止我」 、「喺乜乜乜(例如轉工、有新嗜好)之前,你對我好好格」 、「唔係因為緊張你,點會管住你」 、「我ex對我好衰,所以我而家先會係咁」 等等,總之千錯萬錯,都唔係佢嘅錯。

 2. 扮慘豬

當覺得自己地位受到威脅,佢哋會講:「你係我全部,無咗你我唔知點算」、「全世界得你一個明白我」、「我已經好慘喇,唔好揼低我一個」、「你係咪想唔要我喇?!」等等,呢啲說話當中有個共同思想,就係所有嘢都圍繞住佢,同佢嘅需要,而佢嘅另一半似乎要對佢嘅不幸負責。


3. 恐嚇

所謂嘅恐嚇,程度可以由輕微至嚴重,例如狂send message、要脅喺FB唱衰你、佢會傷害自己,甚至乎會傷害你或你身邊嘅人(情況嚴重,就要識保護自己,唔好勉強維持)。

4. 大對策

總括而言,情感勒索就係一方想控制對方,如果你發現另一半有呢類傾向,而情況未算要即走咁嚴重,你要:

-諗下自己係咪打算咁樣一世落去?

-坦白同對方討論,睇下可以點樣一齊去面對,唔好因為心軟或內疚而讓步,要知道逃避只會令雪球越滾越大,對大家都唔好。

-俾對方明白每個人都要對自己嘅人生負責,是旦一方勉強改變去迎合,係唔會令段關係健康成長。

-對方好難一時間改變過嚟,有時要狠心啲,有獎有罰,好似對付細路仔扭計咁,唔可以下下都俾佢得逞。

You may also like