3招令另一半聽到你講嘢!

TEXT: juju edited by P

有啲女生經常投訴,有啲嘢佢同另一半重複講過好多次,但對方硬係唔聽/聽唔到,好勞氣。同做presentation或開會一樣,要對方聽到你,除咗重複講,仲要加啲小技巧。 

1. 聆聽

先留意下大家傾嘢時,自己有無成日搶住講、好少靜落嚟聽?如果諗落自己有呢個影子,好難要求另一半乜都聽你。以後嘗試先聆聽,唔使心急分辯,平心靜氣俾佢講完先,咁跟住你回應嘅內容,對方先有空間消化到。



2. 點到即止

兜兜轉轉過度重複相同內容,好容易變成煩,咁樣似單方面表說,多過似兩個成熟嘅人坐低商量,所以傾嘢時簡明扼要咁講出重點就夠,然後俾時間對方消化同回應。

同埋有時大家講講下,難免會講咗啲怨對方點唔啱、自己點付出嘅說話,呢啲說話好容易導致嗌交收場,有發洩效果多過建設效果。



3. 尊重彼此嘅不同

大家幾相愛、喜好、興趣幾接近都好,始終都係獨立嘅個體,總有啲嘢大家睇法唔同,呢種感覺可能會令你好唔舒服,但係要提醒自己,佢嘅諗法同你嘅諗法都係同樣咁重要,有時無話邊個一定啱/一定錯。

keywords Keywords:

You may also like