你有閃婚的潛質嗎?

TEXT: juju

幻想你一個人,住進有兩面落地玻璃窗嘅studio flat,其中一面窗特別光猛、有陽光入屋,你會想用嗰面窗嘅範圍嚟:

A. 擺梳化,做客廳,同大家一齊享受陽光
B. 擺睡床
C. 擺餐枱,做飯廳
D. 擺書枱,做嘢都醒神啲

分析:

揀A 閃婚指數 80%

愛情對你嚟講好重要,你一直好想有屬於自己嘅家庭,定落嚟,過你想過嘅生活,如果你遇到你愛嘅人,你會把握機會,亳不猶豫咁快快樂樂閃婚去,唔想再嘥時間去玩尋尋覓覓嘅遊戲;

不過如果你未遇到對嘅人,你亦樂於過你自由自在嘅單身生活。

揀B 閃婚指數10%

你做人好冷靜、理智,凡事都習慣睇定啲,按部就班,唔鍾意急就章,所以即使你遇到超級適合嘅對象、鍾意到極緻嘅人,你都唔會俾自己急,就算心裏面團火燒到幾猛烈都好,你都會堅持花多啲時間去觀察對方。

揀C  閃婚指數 30%

你對愛情充滿了幻想,好想遇到一段轟轟烈烈、刻骨銘心嘅愛情,然後熱熱鬧鬧大團圓結局。

當你遇到喜歡嘅人會好想拉埋天窗,但係就未必會好衝動去閃婚喇,因為始終你內心對婚禮有個頗大嘅憧憬喺度,閃咗婚,第日可能會覺得有好多遺憾。

揀D 閃婚指數 50%

你係個超有好奇心嘅人,鍾意玩、鍾意接觸新人新事,嗜好多多,熱愛自由自在嘅生活,你身邊可能有朋友覺得你份人古靈精怪,會閃婚都唔出奇。

但係其實你對結婚呢回事唔係話好積極,「玩多啲」先係你嘅人生哲學,除非你遇上200% Mr. right,否則都好難叫你定落嚟。

 

 

 

You may also like