婚戒點揀好?揀結婚戒指5大重點

TEXT: juju

求婚戒指女生無得揀(如果係被求婚的話),但係say咗yes之後,結婚戒指就有得一齊揀喇!呢個小玩意一戴幾十年,揀嘅時候要注意啲咩呢?

1. 設定預算

先定咗預算先,去到舖頭要謹守原則,唔好隨便睇啲超出咗預算嘅款式,咁好易出事架!

2. 縮細選擇範圍

喺亂入首飾店之前,不妨預先同未來先生傾好鍾意咩顏色,白金、金、玫瑰金、K金?想要簡單定出位啲嘅款式?咁就唔使行到腳跛都無頭緒啦!

3. 顧及實際需要

考慮一下你哋嘅生活style同習慣,會唔會做嘢唔方便戴戒指,經常要除落嚟?咁會增加咗唔見戒指嘅風險;如果需要經常做粗重嘢,會撞到戒指,就揀啲硬身、無咁易變形嘅物料,如白金。而戴得舒唔舒服亦好緊要,一啲無邊框、唔闊身、唔厚身嘅款式可減少梗住唔方便手指活動嘅感覺。

4. 諗長遠

時尚大膽款式襯你哋的話當然ok,但由於呢樣嘢要戴好耐,不妨想像下個款你20年,甚至50年後仲啱唔啱戴。

5. 試啱size

試戒指好似試鞋咁,你唔同時段、身體狀態之下去試,都會感覺唔同,最好趁你哋情緒輕鬆嘅時候去,盡量唔好朝早去,有啲人朝早會有少少水腫。不過咁,人隨便年歲、體重增減,手指粗幼度都會改變,最緊要問清楚舖頭有無提供改size服務,收費、詳情係點。

*如果你哋之前有訂婚,已有一對訂婚戒指,揀結婚戒指時,不妨揀返同訂婚戒指有少少共通點嘅款式,咁樣兩隻擺埋一齊時,就會好似一個系列咁好睇囉!

You may also like