被不信任,點算好?

TEXT: juju

有啲唔信任係來源自一啲有跡可尋嘅蛛絲馬跡,但亦有一啲朋友嘅猜疑係空穴來風嘅,佢條猜疑筋一旦活躍,就停唔到落嚟,以致好傷感情。假如你另一半無論點都覺得唔舒服、懷疑你有第二個,而你又真係無,你可以試下咁樣幫大家:

1. 增強溝通

如果溝通出現咗問題,佢一定覺得好無安全感,所以當佢問你嘢時,正經而扼要咁答(又唔使講太詳細,免得too much information,搞到佢多嘢諗),唔好求其應或懶得意咁答啲爛gag。

2. 俾佢知多啲

你唔同佢一齊時,日常返工返學發生咗咩有趣嘢,都當話題咁同佢分享下,俾佢有個你同佢一齊嘅感覺。

3. 俾佢見你啲朋友

如果你有啲朋友係成日見嘅,就搵機會俾另一半見下,咁佢腦裏面有咗幅圖畫,就會安心啲;如果佢覺得你啲朋友即係佢啲朋友,佢就唔會覺得受到威脅。

4. 表示關心

多啲欣賞、肯定,提醒佢你好重視佢,少啲批評,對方自然會感覺被愛。

5. 訂立共同目標

坦白同對方傾而家呢段感情面對嘅問題,俾佢知你好重視呢段關係,請佢同你一齊努力。

6. 多啲耐性

被冤枉又真係幾氣頂,但如果你想幫助呢段關係,始終要多體諒,嘗試喺佢嘅角度去睇,或者會發現邊啲位要加強溝通、邊啲位易引起誤會,俾一段時間去建立返個互信,呢個目標唔係無可能達到嘅!

You may also like