同男生食飯,幾時AA好?

TEXT: juju

呢個疑惑,相信好多朋友都有過,同普通異性朋友、初約會嘅男生,甚至拍緊拖嘅對象,無論你幾多歲,喺張帳單出現時,都曾幾何時出現過小小嘅腦交戰?


最宜AA狀況

阿媽話禮多人不怪,同錢銀有關嘅嘢,採取保守策略(即係乜都預咗夾份先)就最穩陣。

1. 睇感覺

如果忽然內心有疑惑,唔知夾唔夾錢好,最簡單嘅做法就係夾!咁就唔使諗咁多,慳返啲「腦」 力。

2. 唔係好熟

咁唔使煩啦,除非對方一早就講咗因為乜乜乜要請你。

3. 只係好朋友關係

你唔想對方誤會。

4. 傾公事

大家約出嚟,係傾啲公事上嘅嘢。

5. 貼心

你真貼心,唔想對方使咁多錢。


提出都有技巧

唔想好似啲老人家飲茶埋單時鬆踭、推手咁搶張單,不妨參考以下建議:

1. 事先張揚

你甚至乎可以喺未坐低就提出,例如大家諗去食乜時,就提出「呢餐唔好食太貴喎,我儲緊錢讀書喔!」咁就俾晒位大家表明對呢餐飯嘅態度啦,唔使估估下。

2. 飯前講

坐低咗睇餐牌時輕描淡寫咁提出都得,例如一路睇餐牌一路講「好多嘢都好好味喎,不如我哋揀幾個share,夾返吖!」如果對方提出請你,而你又想俾佢請,咁就大方接受,唔使等埋張單先講,就可免尷尬啦!

P.S. 如果事先了解咗呢餐AA,點菜時盡量揀啲同對方揀嗰啲價錢相若嘅。

P.P.S 如果對方好堅持要做東,就接受囉,提出下次嗰餐你請返。

You may also like