想戀情開花結果? 4招令感情關係健康發展

情人節, 單身情人節, 單身情人節 做咩好, 單身情人節點過, 單身情人節建議, 單身情人節點算, 愛情

同得對方一齊,當然想同對方開花結果,不過長路漫漫,到底點先可以令段感情關係健康啲,令彼此都相處得開心啲?

1 練習溝通

雖然話有時一凹一凸都係夾,但如果開始有唔情願、唔甘心嘅情況,就要主動突破「盲腸」,唔係長此落去段關係都唔健康架。 


唔少心裏面嘅刺,都係因為溝通不良造成,有時就係過分擔心唔知對方點諗你,於是一直無好好表達自己。

嘗試喺氣氛輕鬆時,表達下自己嘅諗法、開心/唔開心、喜惡、煩惱(咁又唔好一下子成籮倒晒出嚟),一次講少少,留意對方反應,睇下點樣可以建立出有交流、有建設性嘅對話。

例如其實你食唔到太辣,但你又一直就佢,不妨搵次一齊食非辣菜時,輕輕提起上次食完麻辣火鍋,個肚唔舒服咗兩日,佢總會回答你一啲嘢,你就順勢同佢講你最鍾意食咩菜,第日你陪佢食少少辣,佢又陪返你食第二啲,又或者大家一齊研究下有咩解辣方法,咁就建立咗個溝通啦!

2 有同自己Fd hea嘅時間

每個月搵幾日自己約fd,單對單同摯友又好,一班人柴娃娃都好,就算只係食個brunch、放工飲一杯,呢啲都係你個人社交圈嘅時光,有助纾緩壓力架。

重點係呢啲自己fd約會就唔好預埋男友喇,你當然可以同佢擁有同一個社交圈,但都要有自己同fd嘅時間。

3 設計me time

除咗同fd,都要俾自己同自己相處,喺呢個私人時段,你自己就係中心,做自己想做嘅事,煮餐靚飯俾自己又得,出去食餐好嘅又得,專心做個facial亦得,報堂瑜伽班俾自己都得,話佢知你有自己嘢做,做完先搵佢(除非有急事)。

Me time並唔自私,人人都應該享有私人時間,咁先有空間打理思緒,同其他人好好相處。


4 學會原諒自己

人人都會犯錯,有時我哋容易原諒別人,但就唔易放過自己,儲埋好多自責,咁樣會積壓負能量同壓力,對自己同身邊人都無益處。尤其係你對住男友嗰時,好容易會將負能量發洩咗落男友度,又或者對住佢愁眉苦臉咁。
 

所以你應該同自己講,今次白痴咗,俾自己唔開心一陣,然後就要向前看,同自己講:「唔好擺喺心,下次做好啲就得」,如果有個朋友同你講佢做咗啲白痴嘢,你都會咁樣安慰佢,係咪?咁樣先唔俾你嘅個人情緒影響到你同另一半嘅相處。=P

keywords Keywords:

You may also like