讀者分享!最想收的聖誕禮物

TEXT:Stephanie

就快到聖誕節,相信好多人都唔知送咩禮物俾另一半好,所以我哋今次搵嚟4位男生同4位女生同大家分享下佢哋收過最難忘嘅禮物係咩,同埋今年最想收到乜嘢聖誕禮物,等大家可以參考一下!

1.

Key
年齡:30+
職業:設計師

收過最難忘嘅禮物:鬚刨。因為對方好細心,留意到我每日都要用嘅鬚刨壞咗,然後送一個新嘅俾我,非常貼心。

最想收到嘅聖誕禮物:自製嘅小禮物,最好係比較實用、細細件,可以隨身攜帶,例如鎖匙包、散紙包等。

2.

Samson
年齡:25歲
職業:護士

收過最難忘嘅禮物:女友親手織嘅頸巾,不過個人覺得比較適合中學時期返學戴,因為比較難襯到出街衫。而近來收到一件女友揀俾我嘅冷衫,我都好鍾意,因為冷衫襯恤衫出街都好好睇!


最想收到嘅聖誕禮物:手錶或者袋,比較實用同耐用嘅嘢。此外,我假日都鍾意做下gym或者行山,所以背囊都唔錯。

3.

Gary
年齡:30+
職業:Associate Digital Director

收過最難忘嘅禮物:女友DIY相架,上面有一段佢想講俾我知嘅message,有心意亦好有意義,放喺公司枱頭做嘢會更加有動力。

最想收到嘅聖誕禮物:運動腕帶,因為年紀大,想做多啲運動,戴住條運動腕帶就可以提醒自己要多做運動。

4.

Kinsman
年齡:24歲
職業:Marketing

收過最難忘嘅禮物:女友自製嘅video。入面有好多我哋一齊影嘅相兼播住我最鍾意聽嘅歌,睇嘅時候會勾起我哋之間嘅點滴同回憶,令我覺得好感動。

最想收到嘅聖誕禮物:自己可以買到自己想要嘅嘢,所以都係希望收到DIY嘅禮物,例如自己設計嘅情侶Tee或者DIY小擺設都唔錯,因為可以一直保存。
5.

Mandy
年齡:23歲
職業:銀行

收過最難忘嘅禮物:一次驚喜嘅旅程。喺唔知情嘅情況下被帶到台灣過生日,所有嘢都已經安排好(住宿,行程等),覺得好驚喜又浪漫!

最想收到嘅聖誕禮物:返工壓力大,個人又攰,如果收到Spa / massage package就可以好好relax一下。

6.

Rita
年齡:20歲
職業:學生

收過最難忘嘅禮物:男朋友喺外國寄返嚟嘅錄音公仔,可以每日聽到對方嘅聲音又可以攬住佢瞓。

最想收到嘅聖誕禮物:DIY聖誕卡或者小禮物,最緊要有心意同誠意,而且又可以留念。
7.

Yu
年齡:23歲
職業:PR

收過最難忘嘅禮物:親手寫嘅聖誕卡,因為男友從來都唔會寫信 / 整手作嘢,但有一年竟然收到佢親手寫兼有插圖嘅聖誕卡!雖然字體同圖畫都唔靚,但真係好難忘(偷笑)。

最想收到嘅聖誕禮物:情侶款式嘅頸巾 / 其他情侶款式單品,可以拍拖嗰時一齊戴,感覺好sweet。

8.

Christy
年齡:21歲
職業:記者

收過最難忘嘅禮物:有一年生日男朋友送咗張好似memory card咁嘅生日卡比我,用timeline形式再加相片記錄我地之間一齊做過嘅野同去過嘅地方。我覺得好感動,因為對方會記得我哋所有一齊經歷過嘅事。

最想收到嘅聖誕禮物:頸巾或者冷帽,可以過一個暖笠笠嘅聖誕。

You may also like