中村藤吉香港新店推4款新品!

TEXT:韋寶

喺尖沙咀美麗華商場試業中嘅中村藤吉香港店,喺2016年6月18日就會正式開業!最開心係新店會有4款新品推出,所以又有新嘢試啦!



要數最可以一次過滿足你多個願望嘅,就非藤吉拼盤(港幣108元)莫屬!因為你可以一次過食到多款由抹茶同焙茶製作嘅招牌甜點,包括抹茶及焙茶雪芳蛋糕、香濃抹茶芝士蛋糕、抹茶焙茶扭紋軟雪糕、招牌抹茶啫喱,配以時令水果及鮮忌廉,簡直係大滿足呀!



仲有仲有,中村藤吉香港店同京都本店同步推出期間限定嘅士多啤梨芭菲(港幣108元),係咪好開心先?!芭菲杯入面有抹茶雪芳蛋糕、脆脆玄米、櫻花蓉、士多啤梨蓉,白玉丸子同店家自家製嘅香滑士多啤梨忌廉,配上抹茶雪糕同香滑嘅軟雪糕,夠晒colorful之餘,無論味道同口感都好有層次!



喺新店仲可以食到日本傳統甜品葛切(港幣88元),葛切由葛粉製成,呈透明狀嘅佢口感煙韌爽滑,點埋店家自家製嘅沖繩抹茶黑糖漿,很想吃吧?!



至於小編一向都超鍾意食嘅蕨餅(港幣88元),喺新茶室會以現場即製形式供應!除咗抹茶口味,仲有新嘅黃豆粉口味,搭埋醇香黑糖漿同抹茶糖漿,係必食推介!不過蕨餅每日限定供應,賣晒就無架喇!



中村藤吉香港店 (新茶室)

地址:尖沙咀彌敦道132號美麗華商場3樓3005-9號舖
試營運日期及時間:2016年6月13至17日,中午12時至晚上8時
正式開業日期及時間:2016年6月18日,中午12時至晚上11時
電話:(852) 2156-1168
備註:茶芥每位港幣10元,每位食客必須惠顧最少一份飲品或食品,用餐時間為每位90分鐘。

 

You may also like