打工仔要學識!Say Yes都要講Timing

juju

 

出嚟做嘢,say no要學,其實say yes都要!亂咁say yes,辜負咗人,辛苦咗自己,對所有人都無好處!喺say yes前,必先考慮:

1. 權衡利弊

乜都say yes係可能會俾人好印象,但如果到頭來deliver唔到承諾,都只會毁咗大家嘅關係,破壞咗個人誠信。所以喺答應一啲嘢之前,考慮下利害關係,自己係咪有能力抽調/重新分配手頭上嘅工作嚟配合,如果自己根本做唔嚟,就唔好隨便話好。

2. 顧及整體利益

利益,係多方面嘅,唔係淨係自己有著數先叫做利益,有時啲嘢表面上你未必即時有明顯好處,但係如果對對方/成個團隊嚟講係好重要、幫到好大忙、好有意思,對你哋將來做起嘢嚟會有好大幫助,咁都係值得做嘅事。

3. 個人成長

好處唔一定係一啲用數字量化到嘅嘢,例如個人成長/經歷,能夠參與喺一個有意思、有趣嘅project度,對建立個人專業、攞經驗都係一啲高價值嘅收穫,當人哋offer你做一樣嘢時,除咗對方提到嘅好處之外,不妨都諗下成件事對人對己有咩價值。

4. 夠唔夠格

雖然人哋請你幫忙/合作係睇得起你,但自己都要諗下自己係咪呢件事最適合嘅人選?明知自己有咩不足,坦白話俾對方知,甚至乎推薦你認為比你更佳嘅人選。以大局嘅最佳利益先行,成個團隊有好嘅outcome,無論直接間接,你都會係得益者之一。

keywords Keywords:

You may also like