同男朋友屋企人去旅行!4件你要知道的事

juju

同埋另一半嘅屋企人一齊去旅行,係有可能發生嘅事,喺盛情難卻之下接受咗邀請,事前最好做足準備,否則返到嚟大家面左左,甚至引發出分手危機就麻煩喇!

1. 同另一半夾定暗號

日對夜對,同平時去佢屋企食餐飯喺兩回事,有啲狀況好難預料,就算你另一半想企喺你嗰邊都好,對住屋企人,佢會左右做人難,所以你同佢最好事前有默契,約定一啲求救暗號,例如問「而家幾多點?」 、「唔該你幫我斟杯水」 之類,等佢知道你需要有人幫你解圍。

2. 唔好太介意自己表現如何

太用力去想俾佢屋企人好印象,好容易會俾咗太多壓力自己,結果去旅行仲攰過返工,其實佢哋叫得你一齊去玩,即係接受你,唔使太刻意去討好任何人。遇到有啲嘢唔啱聽、唔想參與咁多,就用「吓?」、「哦!」等敷衍過去。有咩唔開心,等個trip完咗返去先慢慢同另一半商量。

3. 保留少少私人時間

搵啲適當時機俾自己一個人行下、去飲杯咖啡,等自己叉下電,呢啲時機其實唔難搵,例如話俾佢哋知你習慣傍晚去跑步,晚飯前返嚟、要幫個朋友喺附近買啲嘢返香港,大家1個鐘後喺某處會合。

4. 互相尊重

一齊去旅行,可以當係陪下老人家,可以當係你都順便度個假,可以當係大家互相認識嘅時光,主要目的係乜,去之前清晰定義,喺旅程中互相尊重,一班人去旅行(就算唔係屋企人)都總會有啲嘢要互相包容、相就嘅。

You may also like