向新工Say Yes前要了解嘅5個員工福利!

juju

 

喺決定接唔接受一個job offer前,每個人都有責任了解清楚自己有咩福利,如果唔係到簽約時先知有啲嘢同自己期望差好遠,只會將自己擺喺一個進退兩難嘅尷尬局面。

適當時機

喺面試時一味問呢啲,會俾人覺得你對工作無熱誠,而且面試官可能係你未來上司,佢都未必好清楚呢啲細節,所以要問,都真係唔使咁早問,不妨等到獲得正式聘用通知,先至問清楚HR,呢啲實際上都係你接唔接受一份工要考慮嘅嘢,除非份工係你鍾意到乜都無所謂,如果唔係,簽咗約、做落先覺得唔妥,盞自己心裏有條刺,影響工作表現。

 

該問嘅5大問題

1. 假期:

基本包括有薪病假、有薪年假、例假、補假,幾時開始可以攞年假。

2. 薪金:

月薪、OT有無補水、有無固定花紅/雙糧、加薪機制?

3. 保險:

基本要知有無住院/意外保險、包唔包括身體檢查、平時睇醫生有無得claim、包唔包親屬等,同埋保險幾時開始生效?

4. 進修:

如果做落份工需要進修,無論喺時間上、精神上同金錢上,都會加重咗負擔,所以最好一早了解清楚公司有無進修、培訓資助,等自己有個預算。

5. 終止合約須知:

簽租約都一定要問清楚啦,何況係自己份工?所以唔使唔好意思,主要都係要知最少幾耐通知、提早解除合約有咩手續等。

 

You may also like