嬲又唔出聲?!夢見最愛被殺先知驚

Peggy Suitcase

你有冇試過嬲一個人嬲到希望「佢去死啦!」、「憎死佢呀!」、「以後都唔想再見到佢呀!」當然,你知道嗰個人冇咁易俾你咒兩句就真係會死,但相信你試過發夢見到父母/男友/好朋友無端俾人殺死,你又知唔知道你可能係殺死佢哋嘅兇手?

Maggie夢見自己喺大廈天台,望見遠處男朋友坐喺圍欄邊沉思,正想走過去問個究竟嘅時候,佢見到有個黑影喺男友身後出現,然後推咗男友落樓!Maggie大驚,即刻跑前想去救男友,但一切已經太遲。Maggie大喊,仲喊醒咗添!

了解過Maggie同男友嘅關係之後,發現佢最近同男友為咗小事而爭執,大家喺冷戰緊嘅時候就發咗依個夢。

你可能會諗:「嘩!使唔使嬲到要個男朋友跌落樓死呀!?」沒錯,同男友嗌交本來係正常不過嘅事,而夢境其中一個嘅功用就係情緒宣洩,潛意識就透過夢境為佢發洩屈喺心裡面對另一半嘅不滿。

唔好以為得Maggie咁狠毒,嬲到要殺死對方,其實我哋好多時因為種種原因都係口講冇嘢,例如:對方係我嘅上司/父母(我唔可以頂撞佢)、講咗出嚟驚冇得返轉頭、要「喜怒不形於色」等等,但心裡面嬲到爆炸,最後積積埋埋嘅憤怒就演變成喺夢中要置對方於死地,亦都象徵住因為你收收埋埋,大家冇良好嘅溝通,導致現實中關係逐漸步向死亡。

夢中嘅結局亦都係一種提醒,再唔去修補依段關係,最後可能一切都會太遲。

上面嘅例子,並唔係鼓勵大家有理冇理都發爛渣先,因為極度憤怒時候所講嘅說話都唔係真心話,只係一堆傷害感情嘅說話。

其實勇於表達自己嘅感受,唔單止對身心都有益,更加係成熟嘅表現,不妨等大家下咗啖氣,再三口六面同對方講清楚,雖然對方未必能夠一下子接受你嘅意見,但咁樣總比估估吓更好。

keywords Keywords:

You may also like