為自己著想!29歲未+1前應做的5個準備

TEXT: juju

身體係自己嘅,有啲生活習慣最好襯後生做,長遠嚟講就係愛自己嘅表現,咁如果已經過咗30咁點算呀?咁梗係一齊啦,never too late架!

1. 搵到真心享受嘅運動

做運動可以提升心情、睡眠質素,同時保持體重,減低過肥、糖尿、心臟病嘅風險!但如果係迫住自己去做,唔係真心鍾意嘅,好難維持,所以建議趁有氣力,盡量乜都試下,瑜伽、跑步、游水、潛水、踩單車、行山...搵出一種/多種真心愛嘅運動,等自己可以keep住玩落去。

2. 搵到你信任嘅醫生

醫生都要睇夾唔夾,有個你信任、容易開口同佢講出對身體有任何憂慮嘅醫生,係一件好重要嘅事,如果次次有咩擔心時都唔知睇邊個醫生好,又唔好意思開口問,醫生同你講你又半信半疑,個人就更會徬徨架。

3. 了解家族健康史

如果及早知道家族容易出咩身體毛病,可以提醒你及早預防同定期做必要嘅身體檢查,你知道得越多,就俾到越多資料醫生去俾建議你,呢啲有時阿爸阿媽姨媽姑姐未必會主動醒起講,最好自己問多啲。

4. 照顧自己心理健康

一個人嘅精神健康主宰住每日過得好唔好,有壓力問題、情緒困擾,最好盡早尋求支援,唔好由得佢。俾時間學習接受自己,唔對自己太苛刻,呢啲對個人心理健康都可以打好基礎。

5. 定期同朋友見面

同真心朋友見面,傾下笑下,除咗有助減壓,對身體都有莫大好處。友誼要時間經營同建立,唔係話年紀大咗就一定難識朋友,不過由年輕時打造下來嘅友誼,係有份特別知己/包容嘅感覺嘅!

keywords Keywords:

You may also like