不良關係斷捨離!5步將生命中唔需要嘅人物移除

TEXT: juju

人與人之間有好多種關係,有啲關係keep住喺度只會帶來負能量,久唔久頂心頂肺,但係講到「斷交」又做唔出。其實有時「分」唔會比夾硬「維持關係」難,只要搵啱時機。

1. 搵感覺好嘅時候

就算嗰個人同你勁唔啱嘴形,都唔好揀大家嘈到臉紅耳熱嗰陣時反臉,咁只會留返好多壓力俾自己日後去孭、去諗,最好等大家無乜嘢嘅時候做個了斷,例如大家有合作關係嘅,平心靜氣咁同佢講「大家各自發展」,並祝福佢。

2. 適當解釋

如果對方反應平靜,想你解釋或想解釋佢自己,俾佢問/講,但盡量保持對話精簡,免生枝折;但係如果呢個人傷害過你,而佢根本就知自己做過啲咩又多多藉口嘅,就無謂多講喇!

3. 徹底block

你可以唔再容許呢個人留喺你生活裏面,但佢仍然係存在嘅,如果見到佢啲fb status、Whatsapp message會影響你向前行,就block晒佢,唔好再俾啲唔再重要嘅事阻住你好好生活。

4. 唔使介入第三者

做咗決定就let go,唔好左諗右諗折磨自己。如果你哋之間有啲common fd,唔使同佢哋解釋自己個故仔咁多,亦唔使佢哋take side,總之嗰個你唔想佢再involve喺你生活裏面嘅人已經離開咗,你只要過好自己生活就好。

5. 原諒

無論你覺得自己喺呢段關係裏面未夠盡力又好,乜都好,最重要係你要懂得原諒自己,接受自己未能扭轉局面,接受自己唔可以原諒對方造成嘅傷害。

You may also like