一人前慳錢5大好節目!

TEXT: juju

有啲宅又無乜閒錢消費嘅人並不孤單,因為情況類似嘅人其實唔少...咁習慣一個人自在,又唔等如生活一定枯燥嘅,如果你咁啱係間歇性或習慣性孤獨精,呢啲一人獨享嘅節目又慳錢又知性,只在乎你賦予佢什麼意義!


1.  整理屋企

無所事事,最好執屋執房做家務,順便斷捨離下,真架,將啲嘢執好、抹乾淨,好有成功感架!人都清爽啲,好心情自然來!

 

2.  影街景

攞部相機仔或手機出街四圍踱下睇下,喺鏡頭之中可能會對個城市有好多新發現,睇到啲平時行過留意唔到嘅景物人!(而家天氣咁熱,記得自備水壺)

 

3.  郊遊

香港真係一個好地方,無論喺港九新界,郊野公園行山徑、水塘、公園唔會離你好遠,新鮮空氣、花草樹木就在不遠處,當然一個人要做足安全措施,例如揀啲合家歡路段嚟行、周末日頭人較多時去,呢啲普通資料上網就搵到.

4.  自學一種樂器

樂器例如結他、夏威夷小結他、木箱鼓、口琴等平平哋容易入手,又係嗰招:喺youtube有唔少免費教學,摸索下自學唔難,樂趣嚟,而且自娛啫,又好對自己要求咁高,又唔係要去紅館表演。

 

 5.  睇書

睇書其實好自由,想增進知識又得,投入小說世界又得,睇歷史記事又得,學煮幾味都得,知識世界係好廣闊(笑)。嗱,唔好一聽就諗起以前讀書時啲教科書,呢個世界仲有好多書(真的)。除咗圖書館,近年出現咗唔少二手書買賣、漂書行動、免費物品平台,都係搵書嘅好平台,又慳錢又環保。

You may also like