心理測驗:你懂得愛自己嗎?

TEXT: juju

有啲人對人好好,但就忽略咗自己,到底你識唔識得愛自己?立即測試下啦! 

如果你行行下街跌倒,你直覺第一句會同自己講咩?

A. 真白痴,勁樣衰!
B. 啲人搞咩?連條路都鋪唔好!
C. 唔怕,唔痛嘅,唔痛嘅!
D. 嘩,咁都中,陣間要去買六合彩!

分析:

揀A 愛己指數:低

你對自己嚴厲苛刻,唔太識善待自己,成日set好高要求俾自己,搞到自己又忙又攰,潛意識裏面覺得自己唔值得好嘅對待,或者慣咗同自己講:「唉,我呢啲普普通通嘅人,係咁上下啦,又唔係啲咩溫室小花。」你只係對自己係咁,對人哋你可以好寬容,甚至可以犠牲自己,成全別人。

溫提:每個人都照顧好自己嘅需要,先會有剩餘嘅氣力去照顧其他人!下次試下先問自己想點,然後至睇下身邊嘅人想點,就算最後你遷就咗人,你都係有經過考慮去選擇自己點樣同人協調,咁樣喺過程中你會更認識自己。

揀B 愛己指數:偏高至甚高

你可算係寵壞自己嘅類型,有時會慣性將問題歸咎喺人哋身上,可以話係對自己「好過頭」,因而影響咗你對人對事嘅客觀性,長遠嚟講,係會影響你喺人際關係上同個人嘅成長架。

 

溫提:有唔順意嘅事發生,有時唔一定要搵出原因、邊個要負責嘅,有時面對一啲小事,一笑置之都係一個唔錯嘅處理方法。

揀C 愛己指數:中至偏高

你識得當自己好似細路仔咁看待,大部分時間你都識得善待自己,不過遇到啲有挑戰、有難度嘅事嗰陣,你就可能會顯得鍚身,較少鼓勵自己勇敢迎戰、超越自己,咁樣會錯過咗唔少個人發揮嘅機會架!

溫提:面對失敗/嘗試,鍛練個人意志,都係對自己好嘅事嚟。

揀D 愛己指數:高

你有幽默感,擅長安慰自己,即使遇到挫折、創傷,都唔會俾自己鑽牛角尖、沉落去太耐,會為自己搵出口、搵幫助,咁樣反覆經歷,鍛練出穩定嘅個性。

溫提:雖然你屬於睇得開嘅類型,但挫折過後,唔好忘記檢討,睇下從中學到啲咩、下次可以點樣做得更好,等自己可以突破框框。

keywords Keywords:

You may also like