心理測驗:你最需要邊種能量?

TEXT: juju

有時我哋會意識到自己近來無乜energy,但又唔係好可以仔細咁講出自己需要啲咩能量,玩下呢個測驗,或者你會知道自己最需要啲乜嘢!

問題:如果有一日你可以睇到地獄係點嘅,你會想睇到地獄邊一part?

A. 受刑情況
B. 投胎過程
C. 審判過程
D. 地獄入面啲工作人員嘅生活



分析:

A. 你最需要:冷靜嘅能量

你好重視個人嘅感覺,遇到咩困難、唔如意,你習慣將佢哋無限放大,好似世界末日已經來臨咁,換着人哋同你呻,你可以輕描淡寫,安慰對方呢啲好小事;你唔係故意忽略人哋面對嘅問題,而係其實你係有能力客觀睇清事情嘅,亦有安慰人嘅能力,但係如果啲嘢發生喺自己身上,你就亂晒籠,失去晒客觀感,亦唔識得安慰自己。

小對策:下次自己遇到咩事時,試下換個角度,當自己係第三者,諗下如果朋友同你分享同一件事,你會點同佢講,然後同自己講一次,訓練自己安慰自己、冷靜去睇事情嘅能力。

B. 你最需要:改變嘅能量

你平時總係俾人好穩定、好妥貼嘅印象,其實你花咗唔少功夫去隱藏真正嘅自己,盡量留喺comfort zone,去保持住呢個狀態。日子耐咗,呢個狀態變成咗限制住你嘅框框,面對一啲新事物或無可避免嘅轉變時,你就會缺乏勇氣去踏出comfort zone。

小對策:當一個人對自己comfortable時,無論面對咩環境,佢都有自己嘅comfort zone。平時搵多啲機會去講感受、表達自己,當環境有需要轉變時,你起碼唔會覺得自己陌生。 

C. 你最需要:自主嘅能量

你怕比較,討厭衝突,又唔鍾意俾人睇低,有啲嘢你會逆來順受,跟大隊走就算,但心裏不爽,感到受傷害,久而久之喺內心積壓咗好多怨氣,總係有種被其他人/事物牽住走嘅感覺,覺得好無奈。



小對策:培養自己嘅興趣,建立屬於自己嘅小世界!無錯,有啲嘢我哋無謂去同人爭同人過唔去,但係喺生活裏面,仲有好多嘢我哋可以控制,例如你鍾意煮嘢食,一有閑暇就做自己鍾意嘅事,同朋友分享,就唔會時時覺得好似棵無根草咁了。

D. 你最需要:穩定嘅能量

你大概一直都覺得自己同人有啲唔同,你思考嘅方式、關心嘅事物、喜愛嘅嘢,都唔係咁經常遇到知音人,你喜歡不斷發掘、思考、調節、求變,雖然唔少人都欣賞你嘅才華同頭腦,但事實上,了解你嘅人唔多,亦容易形成一種孤單、生活步調唔穩定嘅感覺。

小對策:無錯,有時你係啱架,但其他人未必同你同步,甚至乎最親近嘅人,都會有同你想法唔同、步伐唔一致嘅時候,習慣放鬆面對彼此嘅唔同,唔穩定嘅感覺自會減少。

keywords Keywords:

You may also like