有助安眠!放工後該做的4件事

我哋好重視日間返學返工啲時間點用,但一放學放工,好似就成個人散晒,乜都第二日先算。其實如果晚間時間用得好,先可以打好第二日面對生活嘅基礎!

放工後的關鍵時刻 

如果善用晚間嘅自由活動時間,無論睡眠質素同情緒都會好啲,第二日動力都高啲。而最關鍵嘅時刻係臨瞓前1至2小時,當然如果你由傍晚就可以開始進入呢個待機mode就最good啦。

傍晚至晚飯後

以下活動先後次序你可自己調動,唔使勉強同有壓力,反正每一項都係幫你喺一日嘅繁忙過後放慢落嚟嘅: 

1. 傍晚或晚飯後去行個圈,落公園行又得,去球場行都得,如果屋企附近有商場,行下街都得架。

呢個動作係幫你將日頭嘅事務放低,你可以乜都唔諗齋行,亦可以諗啲開心事。

2. 用5-10分鐘檢視今日做咗啲乜,效果、進度如何,點改進。 

原則係只諗5-10分鐘,然後放低佢,一來養成review每日嘅習慣,二來練習攞返個主導權,唔好俾啲嘢時刻都佔據住你個腦。

睡前1至2小時 

次序都係自己安排,睇下你覺得點樣最舒服: 

3.睇書:臨瞓前睇幾頁書,有助將節奏減慢落嚟(就算係因為睇到恰眼瞓,都有助眠作用:P)。 

揀咩書嚟睇都有影響嘅,如果你會因為追故事情節而唔瞓,咁唔好喇,最好揀啲幾頁睇完一節,或者唔使追、可以慢慢睇嘅書種,但電子書就唔好喇。

4.臨瞓遠離電子產品:除咗鬧鐘,唔好開着任何嘢,一係唔好帶入房,盡量製造一個無notifications、聲音、光線嘅安靜環境俾自己。

keywords Keywords:

You may also like