心理測驗:如何令自己活得更開心?

TEXT: juju

每個人嘅人生觀都唔同,尋找快樂嘅根源都唔一樣,睇下自己屬於邊個類型,咁就可以搵出點樣可以令自己生活得更快樂!

以下嘅問題回答Yes或No。Yes得1分,No得0分。

1. 每朝一起身,你會期待好事發生嗎?
2. 你覺得喺一般情況下,你易唔易信人?
3. 你夢想過自己中六合彩或無端端有人送層樓俾你嗎?
4. 你覺得大部人都唔會時時講大話?  
5. 突然收到一個包裹,你會特別開心? 
6. 你會俾自己使咗啲錢、開心咗再先再算嗎? 

7. 你會唔會隨身帶住膠布、針線之類以防萬一? 
8. 有重要嘅appointment或約會,你會特登早啲出門口以防有咩延誤嗎? 
9. 你有無同朋友輸賭一啲嘢嘅經驗? 
10. 如果你要出門旅行,交低鎖匙俾朋友幫你睇屋,你會唔會事先將啲貴重嘢收起?
11. 如果朋友問你借錢,答應一定會還,你借唔借?
12. 出門旅行,你通常買唔買旅遊保險?

13. 有新project或計劃,你會唔會覺得興奮?
14. 如果醫生叫你做次身體檢查,你會唔會諗:「我身體梗係出咗問題! 」?
15. 本來約咗去戶外BBQ,點知落毛毛雨,你會按原定計劃進行嗎? 

分析:將分數總數加起來,睇下你屬於邊類型啦! 

A. 0-5分 比較悲觀嘅類型

好多嘢你都習慣向壞處想,係嘅,無期望就無失望,但係咁亦好易令你變成怕失敗、乜都唔肯試,結果錯過咗一啲美好嘅事物或經歷。 

而且遇到困難或人生低谷時,你會比較傾向放棄或收埋自己,突破唔到障礙。

建議:Set一段時間俾自己,例如一個周末、一個假期、一次旅行,喺嗰段時間盡量停止採用悲觀嘅思維去睇事物。 

不妨試啲以前唔會做嘅嘢(唔使驚天動地嘅,哪怕只係唔去幾日你去開嗰兩間飯堂),或者你會發現可怕嘅事會發生嘅比率唔係想像中咁高呢?係,有時係會失望嘅,但你嘅自信心亦會慢慢返嚟架!

B. 6-10分 不妨偶然突破下

你個性比較穩定、包容,唔算太悲觀,亦唔算過太樂觀,自制能力相當好,對人對己都做到面面俱圓。

當然你可以活得更好,尤其是如果你有時會覺得圍繞你身邊嘅嘢有啲乏味感的話,你係可以突破框框嘅!

建議:想為生活加添一點火,不妨俾機會自己去投入喺一件你有熱情嘅事上面!

例如你愛上夜跑、打沙灘排球、整餅etc.,就容許自己全情投入,go for it!

唔好勒住自己團火,唔係要放棄晒一切先叫投入嘅,喺生活中鑽窿鑽罅搵位俾自己去做想做嘅事,都可以好有滿足感同樂趣架!

C. 11-15分 天生嘅樂天一族 

性格樂天嘅你,凡事都睇好嘅一面。遇到啲好玩新事物,你心口個勇字就會走出嚟,就算失敗、遇到挫折,你都可以輕鬆面對,下次遇到咩得意嘢,你仍然會童心滿滿、一股作氣咁去試,不過咁樣經常有勇無謀,都會令你錯過一啲好機會。 

建議:樂觀、勇敢係正面嘅,如果可以加多少少耐性、毅力、計劃,你可以將啲好玩事物嘅層次拉得更闊、掘得更深!

嘗試練習冥想、打坐,或者俾啲需要重複鍛練嘅任務自己,即係做啲有修心養性效果嘅嘢,你會發現你接觸嘅事物比想像中更好玩、更有意思。

keywords Keywords:

You may also like