鬆弛熊陪你過聖誕!打卡位勁多:3米飄雪水晶球,鬆弛熊波波池,迴旋滑梯免費玩

text by Jinny,photo by P

又到聖誕!每年聖誕最令人期待嘅就係可愛嘅聖誕裝飾,而今年日本超萌卡通鬆弛熊就會嚟香港同大家見面,分別喺銅鑼灣皇室堡以及尖沙咀THE ONE有大型聖誕佈置,打卡位勁多,而家就同大家率先睇下皇室堡有咩打卡靚相位先~

 

鬆弛熊打卡位1:

冰雪迴旋滑梯+鬆弛熊波波池

估唔到喺商場裡面都可以玩滑梯!大家可以係金色嘅鬆弛熊子屋滑到波波池,而波波池仲擺放咗多隻18cm高嘅鬆弛熊,坐喺個波波池入面,就好似喺一個夢幻浴缸入面,同鬆弛熊一齊沖涼~~無論咩角度影過去都咁靚。

 

鬆弛熊打卡位2:

3米高飄雪水晶球

見到呢個咁靚嘅水晶球,以為只係一個裝飾?點止!你仲可以入埋水晶球影相添~球內嘅雪會一直飄動,而外面影入去,就好似你同鬆弛熊一齊享受緊漫天飄雪嘅冬日氣氛,夢幻指數直達滿分。

 

鬆弛熊打卡位3:

「熊」之友誼日式小燈塔

今次聖誕裝置其中一個大特色,就係鬆弛熊嘅新成員「茶小熊」(相中左)首次登場,唔好睇佢同鬆弛熊咁似樣,佢心口多咗白色毛毛,腳板更有一個標記。而以下呢個小白熊,茶小熊手拖手喺日式燈塔旁玩嘅可愛裝飾,你又點可以唔同佢地影返張相留念?

 

鬆弛熊打卡位4:

暖笠笠「鬆」餅塔

如果你係鬆弛熊粉絲,一定知道佢地鍾意食鬆餅,今次鬆弛熊帶埋鬆餅製作小遊戲,只要將所有紅色鬆餅擊走而冇驚動到上面嘅鬆弛熊,就可以得到造型曲奇做獎品。

 

鬆弛熊打卡位5:

聖誕「熊」橇車

聖誕節唔少得聖誕老人嘅橇車?但今次鬆弛熊充當聖誕「熊」人,載住一車嘅禮物同大家見面!坐喺上面可以一次同埋小白熊同小雞合照,充滿佳節氣氛。

 

鬆弛熊打卡位6:

小白熊冬甩水泡

小白熊著住節日服飾,同你一齊坐喺水泡入面合照超cute!

影相位仲有好多,仲可以喺pop-up store買走鬆弛熊精品!一齊睇下有咩好買~

 

鬆弛熊POP-UP STORE

喺商場地下影晒相後,就可以到一樓POP-UP STORE掃貨啦!呢到擺放咗超過800款鬆弛熊精品,仲有戴頸巾聖誕版鬆弛熊公仔,以及新朋友「茶小熊」一系列精品,統統喺到買得到。而你手機影咗嘅靚相,仲可以喺POP-UP STORE旁邊印相機免費列印出嚟,留住美好一刻。

 

 

 

同場加映:商場購物專屬獎賞

喺商場買滿HK$600就可以憑單免費得到鬆弛熊2018月曆同埋memo紙!如果連續3日消費滿HK$1,200,就可以換到充氣梳化,而家涼爽天氣最啱就係帶埋佢去野餐。


皇室堡鬆弛熊POP-UP STORE 開放時間

日期:11月11日-2018年1月1日

時間:中午12:00-晚上9:00(星期五六日,以及公眾假期特別延長至早上11:00-晚上10:00營業)

You may also like